Chie semus

Su Babel Film Festival est su primu cuncursu cinematogràficu internatzionale fatu solu pro sas produtziones cinematogràficas chi cherent abbaidare e contare sas minorias, mescamente sas minorias linguìsticas. Est una novidade de importu mannu in su cuntestu cinematogràficu in ue sas produtziones sighint a faeddare solu limbas omologadas e universales, chi cuant, in una carchi manera, s’universu de s’espressada umana. Sa limba de minoria est una limba chi bivet de sa diversidade sua e de sa richesa chi torrat a chie la faeddat. Non solu in sa vida chi l’est garantida dae chie la faeddat, ma fintzas dae sa vida chi sas artes poèticas li torrant a donare onni borta. Su cìnema, chi in su passadu no at valorizadu mai sas faeddadas locales, si non in relata a sa capatzidade sua de fàghere sa caricadura de una manera de bìvere istratificada (in sensu sotziològicu e antropològicu), dae una pariga de annos at intamas torradu a bìvere in s’atòbiu cun sas faeddadas locales, cun sas limbas e sos dialetos chi sighint a bìvere in leadas linguìsticas, bortas meda perifèricas, de totu su mundu. Sas comunidades ant torradu a iscobèrrere s’identidade issoro fintzas gràtzias a una limba chi in su passadu piessinnat s’esistèntzia de cussu grupu e chi in su tempus de su progressu, bàntidu de sas innovatziones tecnològicas, at arriscadu de si pèrdere. Fintzas gràtzias a sas limbas sighidas a faeddare in famìlia, cun sos amigos e in sa comunidade, sa crisi de sas bisiones universales e totales at fatu torrare medas comunidades a iscobèrrere su sensu de apartenèntzia.

In custos ùrtimos annos sa Sardigna at fatu sèberos de importu mannu pro sa tutela de su patrimòniu linguìsticu de sas comunidades de s’ìsula, reconnoschende – mancari tenende in contu sas diferèntzias intre de sas variedades linguìsticas suas – una unidade in sa tutela, in su recùperu e in sa valorizatzione de sas limbas. Su Babel Film Festival naschet fintzas dae su reconnoschimentu de una tzentralidade chi no est solu geogràfica, ma fintzas dinàmica e culturale de su destinu de sas limbas non natzionales.

Su progetu de su Babel Film Festival naschet non petzi dae sa punna de tènnere in contu unu cìnema chi contat semper de prus istòrias perifèricas, in ue s’impreu de sa limba de periferia tenet piessinnos narrativos de importu mannu pro sa resèssida artìstica de s’òpera. Su progetu naschet fintzas ca cheret torrare a dare una unidade de intentos a àreas linguìsticas diferentes, pro nde mustrare sa richesa e donare una testimonia de cantu sa vida de custas limbas podet arrichire s’autore de cìnema, influende subra sa creatividade sua e cun cunsighèntzias figurativas tzentrales in sa definitzione de s’òpera.

De custu ghetu su Festival donat a totus sos autores, siat de documentàrios siat de fiction, sa possibilidade de dare visibilidade e fortza de espressada a sas limbas, pro favorire unu cunfrontu e cuncàmbiu culturale intre sas populatziones de totu su mundu. Su programma de su Babel Film Festival est unu contributu fintzas a s'acarada cun sos universos de sa mùsica e de su teatru – chi dae prus tempus cunforma a su cìnema ant cumprèndidu sa richesa de sas limbas de minoria – ma fintzas de sa televisione, chi est aperèndesi semper de prus a sos disìgios de sas comunidades prus piticas torrendeli su deretu de tènnere boghe.

Sa punna de su Babel Film Festival est fintzas cussu de èssere unu atopu annuale pro sa tzitade de Casteddu, faghende in manera chi sa capitale de Sardigna siat unu logu de acarada e cuncàmbiu e chi custu potzat torrare a paris cun sa vocatzione sua de tzitade in ue sas diversidades si podent atobiare, faeddare e cumprèndere. Est una ocasione de importu pro chi, faghende su cìnema, e prus in generale faghende arte, atzapat una bena de creatividade in sa diversidade de sas limbas de minoria (siant limbas, dialetos, faeddadas, slang e àteru), in sa fortza figurativa e comunicativa issoro. Cussas limbas espressivas chi, pròpriu ca non sunt riduidas a sa netzessidade de una comunicatzione funtzionale e funtzionalìstica, dant una visione prus poètica de su mundu, prus acanta a sa vida de sas comunidades, in ue sa vida fitiana est dìnnia de èssere bìvia.

CANALES UFITZIALES

CUMPARTZI SA PÀGINA

BABEL FILM FESTIVAL
c/o Società Umanitaria
Viale Trieste 118, 126 - Cagliari
Privacy Credits
© Totu sos deretos reservados
SEGRETERIA
Tel. +39 070 278630
info@babelfilmfestival.com