Paolo Benvenuti (1946), giai dae pitzocheddu si dèdicat a sa pintura. At frecuentadu s’Istitutu de Arte e su Magisteru in Firentze, in ue at leadu su diploma in su 1965. S’annu a pustis s’est iscritu in S’Acadèmia de Artes Bellas. In su 1968 s’est acurtziadu a su tzìnema de avanguàrdia e at lassadu a bellu a bellu sa pintura. Amantiosu de su tzìnema de calidade, at comintzadu a fàghere carchi documentarieddu. Unu de custos, Fuori gioco, at bìnchidu in Montecatini su Prèmiu Fedic pro su mègius cortometràgiu. A primìtzios de sos annos Setanta at fatu pro sa Rai su mediumetràgiu Medea, il teatro del Maggio di Buti chi l’ant seberadu pro su Fèstival de Berlinu de su 1973. In su matessi annu at contivigiadu sa versione teatrale de s’ispetàculu, presentada in su Fèstival Mundiale de su Teatru de Nancy. In su 1972 at traballadu, comente a assistente voluntàriu, in su set de L’età dei Medici de Roberto Rossellini. Duos annos a pustis, in su 1974, at giradu su primu longumetràgiu suo, Frammenti di cronaca volgare. In su 1975 est istadu assistente voluntàriu de Jean Marie Straub e Danièlle Huillet pro Moses und Aaron. In su 1982 at fundadu su tzineclub ‘Arsenale’ in Pisa, istitutzione chi a dies de oe ponet paris prus de deghemìgia ispetadores. In su 1988 est torradu a sa regia cun Il bacio di Giuda, presentadu in sa Mustra de su Tzìnema de Venètzia; ant sighidu in su 1992 Confortorio, in su 1996 Tiburzi, in su 2000 Gostanza da Libbiano e in su 2003 Segreti di stato. At ghiadu, in mesu de àteras cosas, cursos e seminàrios de teoria de su limbàgiu audiovisivu in istitutos meda, siat in Itàlia siat in àteros logos.
Marina Marzotto est fundadora e Senior Partner de sa domo de produtzione indipendente Propaganda Italia, in ue tenet su ruolu de Responsàbile de s’Isvilupu e de sa Produtzione. In antis fiat COO de Moviemax Media Group in su biènniu 2012-2013. Pro prus de 10 annos est istada Partner de Propaganda G.E.M. – su canale internatzionale chi s’incurat de finantziare e fàghere promotzione a films, sèries e vìdeos musicales – e s’incurat de mediare sos investimentos de capitale e promotzionales in cuntestu tzinematogràficu e audiovisivu. At comintzadu sa carriera sua in su campu de s’arte cuntemporànea e a pustis at tramudadu a su campu de sa publitzidade e est istada Diretora de sa Comunicatzione internatzionale de su grupu Salvatore Ferragamo. In sa filmografia manna sua b’agatamus Razzabastarda de Alessandro Gassman (2012), La macchinazione de David Grieco (2016), 5 è il numero perfetto de Igort (2019), Monica de Andrea Pallaoro (2022), After Work de Erik Gandini (2023).
Emanuele Galloni, nàschidu in Roma, laureadu in Sièntzias Polìticas, dae su 2000 iscriet pro publicatziones meda de mùsica e de ispetàculu e traballat comente imbiadu dae Londra pro su programma de Ràdio Rai Magazine. Coprodutore de docusèries, at fatu esperièntzias e collaboratziones meda in agentzias de imprenta TV. In su 2005 at fatu nàschere Videoplugger, agentzia de intermediatzione de temas televisivos, chi luego divenit su bendidore in Gran Bretagna de sa RAI, leende.nche finas s’Ispetore Montalbano a sa BBC. Rapresentante a livellu internatzionale de sèries TV in limba de minoria, Videoplugger divenit sa prima agentzia de bèndida in sa distributzione de traballos in limba de minoria, imbatende a nche leare documentàrios a Netflix, Sky TG24 e àteras prataformas.
Serena Schiffini at comintzadu a iscrìere comente a giornalista pro su cuotidianu L’Unione Sarda. Deghe annos de collaboratziones, dae sa crònaca a sas pàginas de cultura e de ispetàculu. Giornalista professionista dae su 2003, a pustis de s’Unione Sarda at traballadu comente a portaboghe in s’assessoradu de sa Cultura de sa Regione Sardigna e posca in sa sede regionale de sa Rai, in ue dae sèighi annos est programmista regista. Faghet programmas radiofònicos de atualidade, ispetàculu e cultura in italianu e in sardu, dae una pariga de annos est contivigiende finas sos programmas televisivos de sa programmatzione regionale in sardu.
Paulo Filgueiras Fachal (Galìtzia, 1979), laureadu in Filologia Galitziana e Diploma ispetzialìsticu in Teoria de sa Literadura e Literaduras Cumparadas in s’Universidade de Santiago de Compostela. Est istadu professore assotziadu de Limba e Literadura Galitziana in s’Universitat Autònoma de Bartzellona e oe est professore in sos istitutos de istrutzione segundària in Galìtzia. At fatu paritzos traballos de chirca in contu de sa literadura galitziana cuntemporànea e est cumponente de su comitadu diretivu de s’assòtziu A Mesa pola Normalización Lingüística.
